No kan du betale for køyretøy med skiltgjenkjenning
Frå onsdag 28. mai kan du betale for køyretøy ved hjelp av skiltgjenkjenning på båtane i Florabassenget og på rutene Vik–Ortnevik og Ortnevik–Måren–Nordeide.
Etter at ordninga med AutoPASS ferjekort vart avvikla ved nyttår, har alle som reiser med køyretøy på båt midlertidig måtte betale med kort eller kontantar om bord. Frå 1. januar har alle reisande med køyretøy fått full rabatt, uavhengig av AutoPASS-avtale.
Når skiltgjenkjenning no kjem på plass, blir det endra: Du må ha AutoPASS-avtale for å få rabatt.
Dette gjeld følgande båtruter:
- 291 Florø–Veiesund–Askrova–Stavang–Svanøy (Florabassenget sør)
- 292 Florø–Rognaldsvåg–Kinn (Florabassenget vest)
- 293 Florø–Barekstad–Batalden–Fanøy (Florabassenget nord)
- 294 Florø–Barekstad–Batalden–Fanøy–Rognaldsvåg–Kinn (fellesturar i Florabassenget vest og nord)
- 1190 Ortnevik–Måren–Nordeide
- 1190 Vik–Ortnevik
Du må ha avtale for å få rabatt
Billettsystemet om bord på båtane er no ferdig oppgradert, og skiltnummeret på køyretøyet ditt vil bli automatisk kopla opp mot AutoPASS-systemet.
Frå onsdag 28. mai gjeld følgande:
Når du køyrer om bord på båten blir skiltnummeret på køyretøyet lese av. Pris og betalingsmåte er avhengig av kva AutoPASS-avtale du har og kva køyretøy du har:
- Du får 10 prosent rabatt dersom du har ei AutoPASS-godkjent bombrikke i køyretøyet ditt. Dersom du har bombrikke blir du fakturert for reisa i etterkant.
- Du får best rabatt dersom du har brikke og AutoPASS for ferje forskotsavtale. Denne avtalen gir 50 prosent rabatt for privatkundar og 40 prosent rabatt for bedriftskundar. Dersom du har forskotsavtale blir du trekt frå det innbetalte forskotet på ferjekontoen din.
- Dersom du ikkje har verken AutoPASS-brikke eller forskotsavtale, må du betale fullpris og betaler med kort eller kontantar om bord. Du blir ikkje etterfakturert slik som på ferjer.
- Dersom du har eit nullutsleppskøyretøy, gir dette også rabatt, som kjem i tillegg. Nullutsleppskøyretøy under 6 meter får 30 prosent rabatt, mens større nullutsleppskøyretøy får 50 prosent rabatt.
Slik får du AutoPASS-avtale
På autopassferje.no finn du informasjon om korleis du teiknar avtale.
Her finn du også prisar for køyretøy på båt og informasjon om kva rabattar som gjeld. Prisane for køyretøy på båt i Vestland følger i hovudsak AutoPASS-regulativet for ferjetakstar, med unntak av passasjerprisar.
Publisert:
Oppdatert: