Nye namn på enkelte haldeplassar

Skyss forvaltar det nasjonale stoppestadsregisteret på vegne av Vestland fylkeskommune.

Namna og skrivemåten i stoppestadsregisteret er grunnlag for stoppestadnamna i alle andre informasjonskanalar. Stoppestadar får namn etter lokale, nedervde stadnamn.

Stadnamn er mellom våre mest synlege kulturminne. Dei seier noko om natur- og kulturhistoria til vestlendingen. Vestland skal etter Regional plan for kultur (vestlandfylke.no) arbeide for å ta vare på og fremje stadnamntradisjonane i fylket. Stadnamnlova (lovdata.no) og prinsippa i handbok for rutedata blir lagt til grunn i val av namn og skrivemåte. Fylkesutvalget i Vestland vedtek namn på stoppestadar. 

Språkrådet, Kartverket og Vestland fylkeskommune (Skyss) har tidlegare blitt einige om at det er ønskeleg med ein grundig gjennomgang av namna på dei mange haldeplassane i Vestland. Dei aller fleste av haldeplassane vart oppretta før Skyss vart etablert, og lenge før digitale tavler og reiseplanleggarar gjorde oss meir bevisste på og avhengig av desse namna. Namna er ofte ei arv etter tidlegare lokale rutebillag, og mange av stoppestadane ville nok ikkje fått namnet det har om vi skulle gjere ei vurdering i dag. Enkelte stader kan også namnet vere direkte feil, for eksempel fordi eit stadnamn har blitt endra utan at namn på stoppestaden har blitt endra.