Ferjesambandet Jondal-Tørvikbygd stengd frå 9. til og med 14. mars

Published: 2/13/2020 Changed: 2/13/2020

 

Ferjesambandet Jondal – Tørvikbygd vil vere stengd i to periodar i vår. Bakgrunn for stenginga er at det frå 1. januar 2020 vart sett inn ei større ferje i sambandet. Ferjeleiene er ikkje tilpassa ei så stor ferje, og det er difor behov for utskifting av ferjelemmen både i Jondal og i Tørvikbygd. Det vil òg bli utført anna arbeid knytt til ferjeleiene. Når arbeidet er ferdig i juni vil ferja bli køyrt med elektrisk drift.

Stengingsperiodar:

Første stengingsperiode er frå måndag 9. mars til og med laurdag 14. mars.

Andre stengingsperiode er mot slutten av mai, men endeleg dato er ikkje satt.

Alternativ til ferje:

  • For reisande med bil anbefalar vi at du nyttar ferjesambandet Gjermundshamn - Årsnes. Dersom det vil passe deg betre ift kor du bur og kor du skal, kan du også nytte ferjesambandet Kvanndal - Utne.
  • For reisande som vil nytte buss og båt:
    • Vi set inn ein båt som vil gå mellom Jondal og Tørvikbygd. Båten vil ha 8 tur/retur på kvardagar, og 4 tur/retur laurdag og sundag. Båten vil korrespondere med buss Tørvikbygd - Norheimsund. Rutetabell for båten og korresponderande buss linje 749 blir lagt ut her så snart den er klar.
    • Linje 930: Dette er ei busslinje som vanlegvis er gjennomgåande med ferja Jondal - Tørvikbygd. Bussen vil i stengingsperioden måtte køyre via ferjesambandet Gjermundshamn - Årsnes, og den vil difor ha følgjande trasé: 
      • Bergen busstasjon - Tysse - Eikelandsosen - Mundheim - Gjermundshamn. 
      • Reisande som skal på eller av på strekninga Bjørkheim - Jondal må byte til korresponderande buss på Bjørkheim. 
      • Rutetabellar vil bli lagt ut her så snart dei er klar. 
    • Parkeringsplassar: Eit avgrensa tal på parkeringsplassar for privatbilar vil vere tilgjengeleg ved/på kaiene i Jondal og Tørvikbygd.